Василий Михайлович Ванюшев - Удмурт кылэз но литератураез
реклама
Василий Ванюшевлэн кылбуран дуннеяз тужгес но висъямон луо гражданской тематикаё ужъёсыз. Быдзым Атыкай Ожгарлы сизем чуръёсыз но, ас вордиськем палэз пумысен сюлмаськонъёсыз но (солэн вордскем Кусо Какся гуртэз али быремын ни), удмурт калыкенымы выльдиськон бере кылдэм шугадзонъёс но, тодос удысысь малпанъёсыз но (Иднакар пумысен, Г. Верещагинлэн кылёсбурез пумысен), удмурт кылэз, удмуртлыкмес утьыны тыршонъёсыз но – ваньмыз со литератураямы яркыт пытьы кельтиз. Пияшлэсь гожъяськон мылкыдзэ жутиз ньылети классын дышетисез Д. И. Тимофеев. Печатласькыны кутскиз, Можга педучилищеысь Е. А. Коноваловалэн кивалтоно литературной кружоказ ветлыкуз. Соку ик гожъямъёссэ синйылтизы но быгатэмезлы оскон сётизы дано удмурт писательёс М. П. Петров но Т. А. Архипов. Василий Ванюшевлэн «Выжыосы» (1976) нырысети кылбур бичетэз печатласькыку, удмурт кылбуретлэсь визылзэ Флор Васильев оръя на вал. Бадзым дышетисеныз кенешон тужгес но шодиськиз «Гажан мерттос» кылбурын. Флор Васильев гожтиз вал: «Нылыд-пиед вордскиз ке семьяяд, / Укно улад ик мертты тон льомпу» («Мертты тон льомпу»). В. Ванюшев та чуръёс борды итиськыса азинтэ: Оз вордиськы война дугдон аре Солдат юртын мусо, ненег нуны, Но кышномурт тулыс потиз кыре, Мерттиз льомпу, малпаз будэтыны. Быриз солдат. Уз вордскы нунызы. Но та мерттос – гажамзылэн пизы. Берлогес та ненег льомпу возы быдэс сад кылдэ, угось карттэк кылем мукет нылкышноос но ас мылкыдзэс буйгатон понна татчы писпуос мертто. Озьы вож сад «пычатиз пумтэм кульчоосаз секыт ожлэсь утем яратонэз». Граждан ожлэсь туала вакытозь кылем огзэ пытьызэ В. Ванюшев яркыт возьматэ «Пужым» кылбураз: «Пересь пужым пушкын улэм . Куке мертчем снаряд пыры». В. Ванюшев граждан темаен кылбуръёссэ огшоры кылсуредъёс но отёнъёсиндылонъёс вылын уг лэсьты (1970-ти аръёсы та ужпум угось патриотической лирикалэн валтись висёнэз луиз ни вал), кылбурчи бадзым огъянэ-йылпумъянэ кыче ке деталь пыр мынэ. Та тодмет «Шунды но Гудыри» (1980) бичетын уката но кужмояз, азьпал радэ потиз. А. Ермолаевлэн пусъемезъя, улонысьтымы зечез но уродэз вискын нюръяськон азьпал радэ потэ, зэм, та валатонъёсты В. Ванюшев герзаны тырше «дауръёс чоже юнмам тодметъёсын». Ф. Васильевен артэ ик В. Ванюшев яркыт возьматэ аслэсьтыз «пичи дорзэ», аслаз чуръёсаз вашкала удмурт осконъёсты но соосын герзаськем сямъёсты, валатонъёсты ужаз кутэ. Гитаралэсь сизьым сизэ возьматэмъяз кылбурчи арнялэсь сизьым удмурт нимъёссэ тодэ вайытэ («Гитара»). Вордиськем гуртэзлэсь кылдэмзэ кылбурчи тазьы маде: Гуртмес озьы шуо: кусо Какся. Какся выжы кин ке лыктэм, лэся, Кусо выллем губрес шурлэн дураз Юртсэ лэсьтэм со вашкала дыръя. Со дырысен кутскем милям выжы – Пичи люкет бадзым шаерамы. «Ондрей кыз» кылбурын возьматэмын вашкала удмурт сям, кызьы удмурт воргоронъёс, ожгаре кошконзы азьын, асьсэлы кельшись писпуэз «йыръялляло» вылэм, соосъя ик гурт калык тодоз, пе, улэп на-а кыдёке кошкем ожчи яке со быремын. Миф пуштросэн пормытэмын «Тутык мувыр» кылбур но. Озьы «Шунды но гудыри» бичетын «пичи дор» («шыпыт лирикалэн валтись тодметэз) но «бадзым дор» (эстрадной лирикалэн тодметэз) огинэ вуизы, соослы луысагес ик книгаын кыкез люкетъёс но нимысьтыз висъямын; нырысетиез нимаське «Милям гуртмы», нош кыкетиез – «Быдэс дунне толын шока, оло…». Та вакытэ ик Ванюшев-тодосчи «Расцвет и сближение» монографиез бордын ужа бере, Россиысь но социализмо кунъёсысь калыкъёсын эшъяськон тема та тодослыко книгаын яркыт адзиське. («Вить чиньы – одиг кикур», «Солнечный каравай». «Дедушкин родник», «Колосок, задевший небо» но мукет). Зуч критикаын, уката ик Москваын, та бичетъёс сярысь ас вакытаз бадзым но умой вераськон жутскылиз (Л. Рудской, В. Владимирова, Е. Дунская, В. Кононов, М. Стаханова). Нылпиослы сизем бичетъёсаз В. Ванюшев яркыт возьматыны тыршиз удмуртъёслэсь дунне шоры аспортэмлыко учкемзэс, угось книгалэн нимыз ик – «Колосок, задевший небо» – тодэ вайытэ удмуртъёслэсь «ин» но «шепъёс» сярысь мадёссэс, текстын со сярысь шара верамтэ ке но. Нош куинь портэм валъёслэн вошъяськемзы (чукна – чуж яке сари вал, нунал – тодьы вал, уй – сьод яке кельыт вал) тодэ вайытэ удмурт батыръёслэсь выж вылэ пыремзы азьын валъёссэс вошъямез. Со вакытэ ик зуч критикъёс шонер пусйизы, берыктисьёс удмурт образъёслэсь яркыт буёлъёссэс зол гинэ бездытиллям шуыса. (1995) бичет «Ельцинизм» вакытлы дунъет сётись книга выллем луиз, кудысьтыз граждан тематикаен сузьетэз «пумитъяськон» шуыса ниманы луэ, отын улон радлэн куашкамез, йырчукин луэмез возьматэмын но соин валче кылдэм сюлэм висён шараямын. Нырысь ик син шоры йотэ кылбурчилэн «Вожмин» поэмаез. Та сузьетэ ик пыро «Сютэмъёс», «Тылпу», «Ку?» но мукет кылбуръёс. Нимысьтыз висъяське удмуртлыкез но удмурт кылэз ултиянлы пумитъяськон («Арыслан», «Быръёнъёс», «Удмурт кыл» но мук.). Асьсэ пуконъёссы но кисыоссы понна гинэ сюлмаськись кузёослэн быдњым державамес люкылэмзы, таркамзы-кесямзы яркыт возьматэмын гротеск амалэн гожтэм «Аслам!» кылбурын. Граждан тематикаез азинтыса, Василий Ванюшев мечак гожъя удмуртлыкмес утён сярысь («Одиг куиньмос», «Ачим кадь ик удмурт эшелы», «Янгыш-а мон?»), куддыръя публицист луэмзэ но уг ваты: Одиг куиньмос гинэ, пе, кылемын Удмуртиысь калык полын удмурт. Ини пыкылонэз но кылимы: Сьорлось муртэз кариськомы, пе, мурт /…/ Зэм, кикыпи мурт нылпиос полын Одно ик бушатэ, пе, аслыз кар. «Меми гожтэт» куинь люкетлы висъяське, Быдзым Атыкай ожгарлы сиземын. Огшоры удмурт гуртысь кышномурт, ньыль пиналъёслэн анайзы, бадзым вормон понна ваньзэ чидано луэ. Куинь арнялы колхозникъёсты тэле ужаны ыстыло, иське, кин юртъерез возёз? Но маиныз уката но висъяське та поэма – со поэмаысь героинялэн война вакытэ лыдзиськыны-гожъяськыны дышетскемез. В. Ванюшев огаз интервьюаз тазьы гожтиз: «Гожтэтлы дышетскон дыр вал-а война вакытэ огназ ньыль нылпиен кылем кышномуртлы? Нош меми басьтиськиз дышетскыны. Тол жытъёсы чындись керосин лампа дорын сое, ужысь жадьыса бертэм муртэ, Душа апае гожъяськыны дышетиз. Жоген фронтэ, атаймы доры, мемилэн печатной букваосын сазнам вакчи гожтэтъёсыз лобизы. Война аръёсы гуртэ кылем кышномуртъёслэн вормыны быгатэмзылы паймымон но вераса быдтонтэм ужъёссы полысь та одигез вал: фронтысь картэзлы зеч карон понна гожъяськыны дышетскиз мемимы». Озьыен, поэма В. Ванюшевлэн улонысьтыз зэмос учырез басьтыса гожтэмын. Мукетыз поэма – «Иднакарын» – герзаськемын Глазкар дорысь вашкала карез копамъёсын (та ужен со аръёсы кивалтизы К.И. Куликов но М.Г. Иванова), отысь шедьтэм узырлыкъёс пумысен кылдэм мылкыдъёсын. Дас вить ар ортчыса, В. Ванюшев нош ик та поэмаез борды берытске, выльдэ-узырмытэ, выль люкетъёс ватса, со дыре ик поэмалэсь пумзэ но мукетгес каре. 2013-ти арын текст огдыре удмурт, француз но зуч кылын печатлаське. Ванюшевтодосчи, М. Худяковлэсь но Д. Яшинлэсь ужзэс азинтыса, трос тырше удмурт батырлыко эпос бордын, ачиз М. Худяковлэсь «Песнь об удмуртских батырах» эпоссэ удмурт кылэ эрико берыктэ («Дорвыжы» нимын). Иднакар – удмуртъёслэн данъяськон но шумпотон синпельметсы, «улонэз-луосэз» возьматись книга-лыдзет: «Бадзым книга кадь .Та удмурт музъем. Коня даур Пычатэмын пушказ?!» Секыт выльдиськон вакытъёс дыръя чапак вашкала Иднакар удмуртъёслы чуказемес югытгес буёлъёс пыр учкыны луонлык кылдытиз, угось вашкалалыкез гажан – со толло нуналлэсь мозмон гинэ овол, со – глобализация вакытэ чуказе нунал понна нюръяськон, куке тросэзтросэз кылъёс бырон калэ вуыны кутско. «Удмурт выжы книга»-ын валтись герой –со «мон» образ, асьме вакытэ улись мурт, кудиз сак чакла археологъёсмылэсь ужамзэс, сюлэменыз шодэ IХ–ХIII дауръёсысь чыжы-выжыосмылэсь улон-вылонзэс. Прозалэн но кылбуретлэн полэстиськыса мынэмзы нимысьтыз выль пуштрос кылдытэ, геройлэсь пушдуннезэ усьтэ – огласянь, со историк, мукет ласянь – кылбурчи. Озьы кык портэм «дыр-вакыт» валатон кылдэ, кытын туннэез толлоеныз герзаськемын, нош толло вакыт ас пушказ чуказеез возе. В. Ванюшев пыриськиз «Мултан уж» сярысь кык сериен «Мултанское дело» (1994, режиссер Л. Вахитов) фильмез кылдытонэ, война дыръя Дебесын улэм но быронлэсь утем литва нылъёс но пиос сярысь «Дети с небес» (Вильнюс: «Студия Ю», 2006, режиссер Н. Юхневич) кинофильмез но «Удмуртские любовные игры» (крезьгурчи Е. Копысова) ораториез лэсьтонэ, В. М. Ванюшев зеч кусыпъёс тупатиз Чувашиысь тодосчиосын но гожъясьчиосын. Солэн юрттэменыз Чебоксарын чуваш кылын поттизы удмурт литературалэсь антологизэ (1993), солэсь аслэсьтыз но музон удмурт писательёслэсь (К. Гердлэсь, В. Ар-Сергилэсь, П. Черновлэсь, Л. Кутяновалэсь) кылбуръёсын, веросъёсын, очеркъёсын книгаоссэс. Публицистика удысын висъясько «Вокруг Мултана: тень на плетень» споръяськись статья сузьетэз (1993) но «Кин шоры «ыбылэ» Мултан уж?» (1994) документальной очеркез. Василий Ванюшев умой кусып тупатиз Парижысь Жан-Люк Моро француз тодосчиен но кылбурчиен, Хельсинкиын али докторантураын дышетскись Еса-Юсси Салминенэн, кудиз Йорма Ваккури кылбурчиен валче кариськыса 2009-ти арын фин кылын поттиз удмурт кылбурчилэсь но тодосчилэсь дасям «Дорвыжы» книгазэ. В. Ванюшев трос аръёссэ ужа ни нырысети удмурт тодосчилэсь но писательлэсь Г. Е. Верещагинлэсь дано нимзэ но ужъёссэ калыке берыктон бордын. Журналъёсын но газетъёсын уно статьяос сяна, со поттиз «Творческое наследие Г. Верещагина в контексте национальных литератур УралоПоволжья» (1995) монографизэ, солэсь трос томъем Люкам сочинениоссэ дасян но печатлан ужен кивалтэ.
