Михаил Коновалов

Михаил Алексеевич Коновалов вордиськиз 1905-ти
арын Можга ёросысь Акаршур гуртын зучо-удмурто
трос нылпиё семьяын. 1918-ти арын Елабугаысь
дышетисьёсты дасянъя семинарие пыре, ар ортчыса,
атаез кулэ, ньылез сузэръёсыз нылпи юртэ шедё. 1922ти арын Коновалов Можгаысь педтехникуме пыре, сое
йылпумъяса, ас ёросысьтыз школаосын ужа.
Кышнояськиз Анисия Андреевна Устюжанинаен
(нылзы Жанна).
 1930-ти арын писатель, Ижкаре вуыса, газет
поттонъя редакциын ужаны кутске. Кык ар
ортчыса, Коновалов Удмуртиысь писательёслэн
оргкомитетсылэн нырысетиез тороез луэ. «Лизи»
верос – нырысетиез бадзым произведениез, кудиз
коллективизация вакытлы сиземын вал. Верослэн
валтись героиняез – ёрмонэз адзыса будэмын, нош
кенешо власть дырья со адямие потэ, гурт улонэз
воштонэн кивалтэ. Ф.Ермаков шонер пусъе
Лизилэсь Л. Сейфуллиналэн Виринеяезлы но
Г.Медведевлэн Лёва Матранэзлы тупамзэ.
 Михаил Коновалов – нырысетиез удмурт
писательёс полысь, кин гожтиз рабочий класс
сярысь роман. Коллективен ужанэз возьматон
«Вурысо бам»-ын валтись инты басьтэ. Петер
Домокош пусъе, композициез ласянь произведение
детективлы укша шуыса.
Ваче пумит пуктэмын кык «вынъёс» – Нушин но Дубов
(Нушин Дубовез жандармлэн семьяысьтыз потэмын
шуыса поя). Дубов ас вакытаз кошке вордскем
юртысьтыз, со – положительной герой, чылкыт сямо,
мукетъёсызлы котьку юрттыны дась; Нушин, атаез кадь
ик, сьось сямо, тушмон мылкыдо, со пояськыса заводэ
интыяське, кышномуртъёс азьын кырсь луэмзэ возьматэ
(Линалэн адзонэз).
Произведенилэн валтись геройёсыз – огъя уж понна,
солэн пайдалыкез понна сюлмаськись адямиос: Дубов,
Радин, Лина, Михайлова; Нушин палан: кулакъёс,
узыръёс – Рябов, Вахтин, Герей; таос вискын сыло
геройёс, кудъёсызлы «будоно» луэ – Гондыр, Звонов.
Романын пумисько зэмос исторической персонажъёс
но – Азин, Наговицын. Тодосчи С. Т. Арекеева пусъе,
геройесты возьматон понна, автор чемысь условной
амалъёслы вазиське, соос полын метонимия но:
кылсярысь, Нушин -–«бака тыбыр» но «вурысо бам»;
романын озьы ик вань «буям ымдур» нимо героиня.
«Вурысо бамлэн» одигез валтись тодметэз – зооморфной
принцип. Ас вакытаз М. Лямин курлаз та произведениез,
геройёслэн куараоссы пудо-животъёслэн куараосынызы
чошатэмын шуыса: я соос боксо, я гырдалляло. Куд-ог
интыосын адямиос воксё но пудо-животлы пормо,
кылсярысь, Нушинлэн кышноеныз нюръяськемез
кионлэн но кечлэн выремзы пыр возьматэмын.
 М. Коновалов, К. Митрей, Г. Медведев 1934-ти арын
СССР-ысь писательёслэн отчамазы вуылизы, отын
тодматскизы Максим Горькиен. Со арын ик М.
Коновалов В гостях у Максима Горького очерк
гожтиз. М. Коновалов драматургия удысын но
кужымзэ эскериз («Вормись кужым» пьеса, 1934),
но критикъёслы та чеберлыко ужез оз кельшы.
1935-ти арын пиналъёслы сизем веросъёсын «Шудо
выжы» бичетэз потиз. Писательлэн веросъёсыз –
дышетись луыса ужамезлэн «емышэз» луэ.

«Вурысо бам» бере Коновалов басьтиське исторической роман кылдытон борды,
кытын возьматыны малпа Пугачёв кивалтэм улсын калыклэсь нюръяськемзэ.
Архивысь материалэз сяна, писатель ужаз кутиз Пугачёв сярысь мадёсъёсты,
беглойёслэсь кырзанъёссэс, пыкиськиз А. С. Пушкинлэн «Капитанская дочка»
произведениез вылэ. Пушкинлэн героез – таланто но жалянэз валасьтэм
бунтовщик, кудиз эксэй пумит куанер калыкез султытэ, Коноваловлэн героез –
зибем калык пала дурбасьтись адями. Пересь крезьчи Гаян пиезлы анаезлэн попен
йырин быремез сярысь маде. Со куспын гуртэ солдатъёсын Алымов вуэ – заводэ
нуыны шуыса ужасьёсты люка. Гаян пумит кариське, пегзе. Нюлэскын со Пугачёвен
пумиське но солэн юрттисез луэ. Гаянэн чош Чипчирган (Гаянлэн Италмас
сузэрезлэн яратонэз) ожмаське. Чачабей (Гаянлэн яратонэз) гуртэ кыле, солэн пиез
вордиське. Чачабеез кужмысь Пужей Балянлы кышнолы сёто. Восстаниез зибо,
Пугачёвез куто, нош Гаян озьы ик ватскыса ветлэ. Романын Пугачёв но Гаян сяна
(зэмос нимыз Туймат), вань на мукет исторической персонажъёс – Екатерина II,
Потемкин, Венцель (Воткакар заводлэн кузёез), Михельсон, Падуров, башкир
Салават Юлаев, зуч крестьянъёс Зарубин, Носков, Кудашев. А. Зуевалэн верамезъя,
романлэн композициез выжыкыллы тупа (атаезлэн пизэ визьнодамез, геройлэн
сюрес вылэ потэмез, шуг-секытъёсын пумиськемез, паймымон юрттисьёс
шедьтэмез, шулдыръяськон-юонэз возьматэмез). «Гаян» романлэн пумгерзетэз
кушето луэ – нырысети люкетэзлэн фольклор инъетэз, кыкетиезлэн – историкодокументальной.
1937-ти арын, сизьым ар гинэ литература удысын ужамез
бере, М. Коновалов пытсэт сьоры шеде, 1938-ти арын
Кемеров улосвылысь лагерьын писатель быре.