PowerPoint - Удмурт кылэз но литератураез дышетскисьлы

Игнатий Гаврилов
(1912–1973)
Улон но ужан сюресэз.
Игнатий Гаврилович Гаврилов вордскиз туала Можга ёросысь
Бадзым Сибы гуртын шоро-куспо улись крестьянлэн семьяяз.
Школаын сое дышетиз тодмо зуч дышетись Вера Васильевна
Толстая, пичи дырысеныз пычатиз солы литератураез но калык
творчествоез яратон мылкыд. Тодэ ваёнъёсаз И. Гаврилов гожтэ:
«Одиг пол, Афанасьевлэсь книгазэ лыдземез бере, Вера
Васильевна шуиз:
– Пиналъёс! Асьме гуртын кыче гинэ устоесь выжыкылъёс уг
верало, кыче гинэ чебересь кырзанъёсты уг кырзало! Гожъялэ
соосты.
Туннэ кадь ик тодисько на: ульчаын куазь пельске,
куашетэ, муръёын тол вузэ. Дядяе валэн кыдёке пу
ворттыны кошкемын, апайёсы но соослэн пукыны
лыктэм эшъёссы черсо но кырзало, агайёсы кут
кутало. Кырзало соос пинал даур но яратон сярысь,
сироталэн но солдатлэн секыт адзонзы сярысь. Мон
жок сьорын пукисько но соослэсь кырзамзэс
быгатэмея тетраде гожъясько. Кырзан чалме, кутско
мадиськыны. Собере ик агайёсы выжыкылъёс
вераны одъяло. Мон уг гожъяськы ни, валес вылын
кыллисько но озьы ик умме усисько».
1924-ти арын И. Гаврилов пыре Можга педтехникуме, кытын
та вакытэ дышетско вуоно писательёс: Г. Медведев, М.
Коновалов, И. Соловьев, Ф. Кедров, И. Курбатов, Т. Архипов,
И. Еремеев но мукетъёсыз. Татын со Яков Ильич Ильин
тодосчиен но кылбурчиен кылдытэм литературая кружоке
мылысь-кыдысь пыриське. Литературной кружокын
дышетскисьёслы визьнод сётъяз дышетись И. Т. Корепанов.
И. Гаврилов тодаз вае Иван Трифоновичлэсь
кылъёссэ: «Азьланьын асьме культура уката но
зол будыны кулэ. Со ужын, пиналъёс, тиледлы
азьветлись луоно. Туж ожыт на удмурт книгаос.
Асьме калык выль кырзанъёс, веросъёс,
романъёс, пьесаос вите. Со понна жадёнэз
тодытэк дышетсконо но ужано»
Таче кылъёс дышетскисьёслы сюлмазы пычазы.
Соос мылысь-кыдысь басьтиськизы гожъяськон
удыс борды. Нырысь ик литературной кружокын
ужано кариськизы поэзия удыс бордын.
«Зарытэсь пормо кылбуръёсмы, кудиз ритмез но
уг тоды, рифма ласянь но валамез ляб,
поэтической образ кылдытыны уг быгыты. Нош
мылкыд бадзым, сюлэм зырдыт, гожъям потэ», –
шуылоз вал берло Игнатий Гаврилович .Пумен
вуоно писательёслэн пормылизы нырысети
чуръёссы.
1927-ти арын И. Гавриловлэн «Гудыри» газетын потэ
«Ой, мемие» нырысети кылбурез. Вуоно
гожъяськись лыдзисьлы Гави Йыги нимын тодмо
луиз.
Литкружокын Гаврилов верос гожъян борды но басьтиськылиз. Нырысети
вероссэ со «Бадзым Миклай но Пичи Миклай» шуыса нимаз. Узыр но
куанер Миклайёслэн бусызы артэ. Пичи Миклай арлы быдэ Бадзым
Миклайлэн ана вылаз борозда пасьта пыре. Вожез потиз куанер
Миклайлэн. Вазь чукна ик межа вадьсы шайгу копаз. Пичи Миклай, шайгуэ
усемезлэсь кышкаса, бускелезлэн ана вылаз пыраны оз дисьтылы ни.
Литкружоклэн одигаз занятияз дышетись ивортиз: «Пиналъёс, жоген
родительской собрание. Умой луысал пичигес спектакль но концерт
дасяны. Оло, кудды ке пьеса гожтоды?» Та бордысен Йыгынлэн кылдиз
нырысети «Сюрес вожын» нимаськись пьесаез. Со ляб вал ке но,
драматургия удысэ пьеса сюрес чогиз. Но спектакль бере атаез пиезлэсь
мылкыдзэ сориз: «Сыче кулэтэмен вырытозь, доре бертыса юрттысалыд
ке, умойгес луысал». Берло драматург тодаз ваёз: «Тини сыче кылъёсты
кыли мон нырысь пьесае но спектакльмы сярысь. Верамын зол: «чик
кулэтэм маке». Бен, соку мон ачим но уг тодиськы вал, пьеса но театр
мынам быдэс улонам самой кулэез, самой бадзымез луоз шуыса»
Курссэс Иж педтехникуме выжтэм бере, И. Гаврилов Ижкаре
вуэ но матысь дыре дышетскон орзэ чутрак воштоно луэ
(атайзэ зеч улись крестьянъёс полы пыртэмен, солы стипендия
уг тыро). Егит мурт Удмурт клубысь драмкружоке ветлыны
одъя. Сое Казаньысь дышетисьёсты дасясь семинариез
йылпумъям Александр Васильевич Сугатов нуиз. Сугатов,
Игнатий Гавриловлэсь быгатонлыксэ адзыса, егит муртлы
сюлмысь ик юрттыны тыршиз. Жоген И. Гаврилов Александр
Васильевичлэн юрттисез луиз: пичиесь пьесаос гожъяз,
литературая монтажъёс лэсьтылиз, спектакльёсын шудиз.
Театр.
1930-ти арын, Кузебай Герд котырти сьод пилемъёс берганы одъямен,
Александр Сугатов Удмурт шаерысь кошкиз. Драмколлективен Игнатий
Гаврилов кивалтыны одъяз. Одиг ёзэн гожтэм ужъёссэ со ачиз ик сцена
вылын пуктылиз, шудылиз но.
1930-ти арын театр усьтон вылысь, Игнатий Гаврилович доры, пьеса гожтыны
косыса, партилэн Удмурт обкомез вазиське. Тазьы кылдэ «Вало ор куашетэ»
пьеса. «… 1931-ти арын 7-ти тулыспалэ «Вало ор куашетэ» спектакльлэн
премьераез ортчиз» .Самой та пьеса кутскон сётэ Удмурт драмтеатрлэн
историезлы (1931). Артистъёс портэм ёросъёсы гастрольёсын но поталляны
кутскизы. Чапак озьы, гастрольысь бертыкузы, Гаврилов кузпалъёс
Москваысен шодтэк-шорысь Кузебай Гердэн пумиськизы. Чай юыса
пукыкузы, Герд Игнатийлы таче кылъёс вераз: «Тон, Гави Йыги, малпасько,
аслыд шонер сюрес быръемед. Мон ачим но кулоно кадь яратисько театрез.
Отчы выжыны мыным бер ини. Нош ти, нокытчы кожылытэк, та быръем
сюрестиды вамыштэ. Кузпалэд усто актриса луоз, нош ачид… Ачид тон
пьесаос гожъя. Соос тынад пормозы. Только дышетскыны кулэ кыктылы ик.
Трос дышетскыны»
1932-ти арын И. Гаврилов Москваысь Театральной
искусствоя А. В. Луначарский нимо государственной
институтэ пыре. Нырысети курссэ йылпумъям бераз, со
Ижевске берытске.
Писатель ас улонзэ быдэсак герза Удмурт театрен. Со –
валтись драматург, ваньзэ-оволзэ ог ньыльдон пьесаос
гожтэ. Войналэсь азьло театрлэн художественной
кивалтисез луыса ужа, спектакльёсын шудэ. Та вакытэ ик
И. Гаврилов мылысь-кыдысь пыриське фольклор бичан
уже, экспедициосын чош гуртъёсы пота (1934, 1939).
Матысь адямиосыз но – Клавдия Кузьминична кузпалыз,
Василий Гаврилович выныз – артистъёс, соос котьку но И.
Гавриловлы юрттыны тыршо. Писательлэн кузпалыз
сярысь таче шуныт кылъёсыз вань: «… Ваньзэ, ма гинэ
мон гожти – кырзан-а, верос-а, пьеса-а, роман-а, –
мынам нырысь кылзисе но мылкыд сётисе, мынам
консультантэ но критике вал Клавдия Кузьминична.
1942 арын, ас мылкыд каремезъя, И. Гаврилов фронтэ кошке.
Отын со «Победа за нами» газетын военной корреспондент луыса
ужаз, кылбуръёс, очеркъёс гожъяз. Гвардиысь капитан Игнатий
Гаврилов трос ожъёсы пыриськылиз, тушмонэн жугиськон дыръяз
ожмаськись эшъёсыз сярысь статьяос гожъяз, вормонлы оскыса,
войналэсь вань кырсьсэ возьматиз (2: 98). Быдзым тыложысь
бертыса, И. Гаврилов Удмурт театрлэн директорез луэ. Берло
аръёссэ со писательёслэн Огазеяськоназы литконсультант вал.
Пьесаос бордын автор ужаз быдэс творческой сюресэз чоже.
Войналэсь азьло нимысьтыз книгаен пото «Кезьыт ошмес»,
«Камит Усманов» но мукет пьесаосыз. Война бере тужгес тодмо
луо «Поэтлэн куараез», «Жингрес сизьыл» но мукетъёсыз. 1968
арын И. Гаврилов «Жингрес сизьыл» пьесаез понна УАССР-лэсь Кун
премизэ басьтэ.
Творчествоез.
Трилогияз автор возьматэ удмурт творческой интеллигенцилэсь,
1920-ти аръёсысен кутскыса, Быдзым Атыкай ож вакытозь
будэмзэ. Сергей Климов, Катя Сергеева, Вася Камашев, Вара
Камашева – гуртысь городэ лыктэм геройёс, кудъёсыз удмурт
профессиональной театр кылдытонэ шедё, выль советской
культураез азинтонэ пырисько. «Тодам вайисько» гожтэмаз
Игнатий Гаврилович пусйиз, трилогияз чош будэм, чош
дышетскем эшъёссэ, удмурт калыклэсь лулчеберетсэ утисьазинтисьёсты возьматиз шуыса. «…Клавдия Кузьминичналэсь
улон сюрессэ Игнатий Гавриловлэн «Вордиськем палъёсын»
трилогиысьтыз Катя но Варвара геройёс вылысь … адзыны луэ»
Солен нименыз сизем.
И. Гаврилов, М. Петров сямен ик, трос кужымзэ но дырзэ сизиз
берыктон ужлы. Кылсярысь, удмурт кылэ берыктиз А. С. Пушкинэз
(«Борис Годунов», «Полтава», «Руслан но Людмила»), Н. А.
Некрасовез («Кинлы Русьын улыны умой»), Н. В. Гоголез
(«Ревизор»), М. Горькиез («Егор Булычев но мукетъёсыз»), Э.
Казакевичез («Кизили») но мукетъёссэ.
Артист, драматург, кылбурчи, прозаик Игнатий Гаврилов Горд
Кизили, Горд Знамя орденъёсын, трос медальёсын пусъемын, солы
РСФСР-ысь но УАССР-ысь искусство удысысь дано тыршись ним
сётэмын.